Часослов на сегодня

«Бог Господь»

И поем на глас тропаря дня:

Диакон: Бог Госпо́дь, и яви́ся нам, благослове́н Гряды́й во имя Госпо́дне.

Стих 1: Испове́дайтеся Го́сподеви, я́ко Благ, я́ко в век ми́лость Его.

Лик (хор): Бог Госпо́дь, и яви́ся нам, благослове́н Гряды́й во и́мя Госпо́дне.

Стих 2: Обыше́дше обыдо́ша мя, и и́менем Госпо́дним противля́хся им.

Лик (хор): Бог Госпо́дь, и яви́ся нам, благослове́н Гряды́й во и́мя Госпо́дне.

Стих 3: Не умру́, но жив бу́ду, и пове́м дела́ Госпо́дня.

Лик (хор): Бог Госпо́дь, и яви́ся нам, благослове́н Гряды́й во и́мя Госпо́дне.

Стих 4: Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей, и есть ди́вен во очесе́х на́ших.

Лик (хор): Бог Госпо́дь, и яви́ся нам, благослове́н Гряды́й во и́мя Госпо́дне.

Тропа́рь священному́ченика Анфи́маГлас 4: И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д:/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Анфи́ме,/ моли́ Христа́ Бо́га// спасти́ся душа́м на́шим. (Дважды)

Сла́ва Отцу́, и Сы́ну, и Свято́му Ду́ху.

Тропарь прп. Феокти́ста Палестинскаго, спостника Евфимия Великаго, игуменаГлас 8: Слез твои́х тече́ньми пусты́ни безпло́дное возде́лал еси́/ и и́же из глубины́ воздыха́ньми во сто трудо́в уплодоноси́л еси́/ и был еси́ свети́льник вселе́нней,/ сия́я чудесы́, Феокти́сте, о́тче наш,// моли́ Христа́ Бо́га спасти́ся душа́м на́шим.

И ны́не, и при́сно, и во ве́ки веко́в. Ами́нь.

Крестобогородичен, глас 8: А́гнца, и Па́стыря, и Спа́са ми́ра на Кресте́ зря́щи, / Ро́ждшая Тя глаго́лаше, слезя́щи: / мир у́бо ра́дуется, прие́мля избавле́ние, / утро́ба же Моя́ гори́т, зря́щи Твое́ распя́тие, / е́же за всех терпи́ши, Сы́не и Бо́же Мой.

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Кафизма 10

Псалом 70

На Тя, Го́споди, упова́х, да не постыжу́ся в век. Пра́вдою Твое́ю изба́ви мя и изми́ мя, приклони́ ко мне у́хо Твое́ и спаси́ мя. Бу́ди ми в Бо́га Защи́тителя и в ме́сто кре́пко спасти́ мя, я́ко утверже́ние мое́ и прибе́жище мое́ еси́ Ты. Бо́же мой, изба́ви мя из руки́ гре́шнаго, из руки́ законопресту́пнаго и оби́дящаго, я́ко Ты еси́ терпе́ние мое́, Го́споди, Го́споди, упова́ние мое́ от ю́ности моея́. В Тебе́ утверди́хся от утро́бы, от чре́ва ма́тере моея́ Ты еси́ мой покрови́тель: о Тебе́ пе́ние мое́ вы́ну. Я́ко чу́до бых мно́гим, и Ты помо́щник мой кре́пок. Да испо́лнятся уста́ моя́ хвале́ния, я́ко да воспою́ сла́ву Твою́, весь день великоле́пие Твое́. Не отве́ржи мене́ во вре́мя ста́рости, внегда́ оскудева́ти кре́пости мое́й, не оста́ви мене́. Я́ко ре́ша врази́ мои́ мне, и стрегу́щии ду́шу мою́ совеща́ша вку́пе, глаго́люще: Бог оста́вил есть eго́, пожени́те и ими́те eго́, я́ко несть избавля́яй. Бо́же мой, не удали́ся от мене́, Бо́же мой, в по́мощь мою́ вонми́. Да постыдя́тся и исче́знут оклевета́ющии ду́шу мою́, да облеку́тся в студ и срам и́щущии зла́я мне. Аз же всегда́ возупова́ю на Тя и приложу́ на вся́ку похвалу́ Твою́. Уста́ моя́ возвестя́т пра́вду Твою́, весь день спасе́ние Твое́, я́ко не позна́х кни́жная. Вни́ду в си́ле Госпо́дни, Го́споди, помяну́ пра́вду Тебе́ Еди́наго. Бо́же мой, и́мже научи́л мя еси́ от ю́ности моея́, и до ны́не возвещу́ чудеса́ Твоя́, и да́же до ста́рости и престаре́ния, Бо́же мой, не оста́ви мене́, до́ндеже возвещу́ мы́шцу Твою́ ро́ду всему́ гряду́щему, си́лу Твою́ и пра́вду Твою́, Бо́же, да́же до вы́шних, я́же сотвори́л ми еси́ вели́чия. Бо́же, кто подо́бен Тебе́? Ели́ки яви́л ми еси́ ско́рби мно́ги и злы, и обра́щься оживотвори́л мя еси́, и от бездн земли́ возве́л мя еси́. Умно́жил еси́ на мне вели́чествие Твое́, и обра́щься уте́шил мя еси́, и от бездн земли́ па́ки возве́л мя еси́. И́бо аз испове́мся Тебе́ в лю́дех, Го́споди, в сосу́дех псало́мских и́стину Твою́, Бо́же, воспою́ Тебе́ в гу́слех, Святы́й Изра́илев. Возра́дуетеся устне́ мои́, егда́ воспою́ Тебе́, и душа́ моя́, ю́же еси́ изба́вил. Еще́ же и язы́к мой весь день поучи́тся пра́вде Твое́й, егда́ постыдя́тся и посра́мятся и́щущии зла́я мне.

Псалом 71

Бо́же, суд Твой Царе́ви даждь, и пра́вду Твою́ Сы́ну Царе́ву: суди́ти лю́дем Твои́м в пра́вде, и ни́щым Твои́м в суде́. Да восприи́мут го́ры мир лю́дем, и хо́лми пра́вду. Су́дит ни́щым людски́м, и спасе́т сы́ны убо́гих и смири́т клеветника́. И пребу́дет с со́лнцем, и пре́жде луны́ ро́да родо́в. Сни́дет я́ко дождь на руно́, и я́ко ка́пля, ка́плющая на зе́млю. Возсия́ет во днех Eго́ пра́вда и мно́жество ми́ра, до́ндеже отъи́мется луна́. И облада́ет от мо́ря до мо́ря, и от рек до коне́ц вселе́нныя. Пред Ним припаду́т Ефио́пляне, и врази́ Eго́ персть поли́жут. Ца́рие Фарси́йстии и о́строви да́ры принесу́т, ца́рие Ара́встии и Сава́ да́ры приведу́т: и покло́нятся Eму́ вси ца́рие зе́мстии, вси язы́цы порабо́тают Eму́. Я́ко изба́ви ни́ща от си́льна, и убо́га, eму́же не бе помо́щника. Пощади́т ни́ща и убо́га, и ду́ши убо́гих спасе́т: от ли́хвы и от непра́вды изба́вит ду́шы их, и че́стно и́мя Eго́ пред ни́ми. И жив бу́дет, и да́стся Eму́ от зла́та Арави́йска, и помо́лятся о Нем вы́ну, весь день благословя́т Eго́. Бу́дет утвержде́ние на земли́ на версе́х гор, превознесе́тся па́че Лива́на плод Eго́: и процвету́т от гра́да я́ко трава́ земна́я. Бу́дет и́мя Eго́ благослове́но во ве́ки, пре́жде со́лнца пребыва́ет и́мя Eго́, и благословя́тся в Нем вся коле́на земна́я, вси язы́цы ублажа́т Eго́. Благослове́н Госпо́дь Бог Изра́илев, творя́й чудеса́ Еди́н. И благослове́но и́мя сла́вы Его́ во век и в век ве́ка, и испо́лнится сла́вы Его́ вся зе́мля: бу́ди, бу́ди.

Чтец: Сла́ва Отцу́ и Сы́ну и Свято́му Ду́ху.

Лик (хор): И ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 72

Коль благ Бог Изра́илев, пра́вым се́рдцем. Мои́ же вма́ле не подвижа́стеся но́зе: вма́ле не пролия́шася стопы́ моя́. Я́ко возревнова́х на беззако́нныя, мир гре́шников зря. Я́ко несть восклоне́ния в сме́рти их, и утверже́ния в ра́не их, в труде́х челове́ческих не суть, и с челове́ки не прии́мут ран. Сего́ ра́ди удержа́ я́ горды́ня их до конца́: оде́яшася непра́вдою и нече́стием свои́м. Изы́дет я́ко из ту́ка непра́вда их, преидо́ша в любо́вь се́рдца. Помы́слиша и глаго́лаша в лука́встве, непра́вду в высоту́ глаго́лаша. Положи́ша на небеси́ уста́ своя́, и язы́к их пре́йде по земли́. Сего́ ра́ди обратя́тся лю́дие мои́ се́мо, и дни́е испо́лнени обря́щутся в них. И ре́ша: ка́ко уве́де Бог? И а́ще есть ра́зум в Вы́шнем? Се си́и гре́шницы и гобзу́ющии в век, удержа́ша бога́тство. И рех: еда́ всу́е оправди́х се́рдце мое́ и умы́х в непови́нных ру́це мои́, и бых я́звен весь день, и обличе́ние мое́ на у́тренних. А́ще глаго́лах, пове́м та́ко: се ро́ду сыно́в Твои́х, eму́же обеща́хся, и непщева́х разуме́ти: сие́ труд есть предо мно́ю, до́ндеже вни́ду во святи́ло Бо́жие и разуме́ю в после́дняя их. Оба́че за льще́ния их положи́л еси́ им зла́я, низложи́л еси́ я́, внегда́ разгорде́шася. Ка́ко бы́ша в запусте́ние? Внеза́пу исчезо́ша, погибо́ша за беззако́ние свое́. Я́ко со́ние востаю́щаго, Го́споди, во гра́де Твое́м о́браз их уничижи́ши. Я́ко разжже́ся се́рдце мое́, и утро́бы моя́ измени́шася. И аз уничиже́н и не разуме́х, ско́тен бых у Тебе́. И аз вы́ну с Тобо́ю, удержа́л еси́ ру́ку десну́ю мою́, и сове́том Твои́м наста́вил мя еси́, и со сла́вою прия́л мя еси́. Что бо ми есть на небеси́? И от Тебе́ что восхоте́х на земли́? Исчезе́ се́рдце мое́ и плоть моя́, Бо́же се́рдца моего́, и часть моя́, Бо́же, во век. Я́ко се удаля́ющии себе́ от Тебе́ поги́бнут; потреби́л еси́ вся́каго любоде́ющаго от Тебе́. Мне же прилепля́тися Бо́гови бла́го есть, полага́ти на Го́спода упова́ние мое́, возвести́ти ми вся хвалы́ Твоя́ во врате́х дще́ре Сио́ни.

Псалом 73

Вску́ю, Бо́же, отри́нул еси́ до конца́? Разгне́вася я́рость Твоя́ на о́вцы па́жити Твоея́? Помяни́ сонм Твой, eго́же стяжа́л еси́ испе́рва, изба́вил еси́ жезло́м достоя́ния Твоего́, гора́ Сио́н сия́, в не́йже всели́лся еси́. Воздви́гни ру́це Твои́ на горды́ни их в коне́ц, ели́ка лука́внова враг во святе́м Твое́м. И восхвали́шася ненави́дящии Тя посреде́ пра́здника Твоего́, положи́ша зна́мения своя́, зна́мения, и не позна́ша, я́ко во исхо́де превы́ше, я́ко в дубра́ве дре́вяне секи́рами разсеко́ша. Две́ри eго́ вку́пе: се́чивом и оско́рдом разруши́ша и́. Возжго́ша огне́м святи́ло Твое́, на земли́ оскверни́ша жили́ще и́мене Твоего́. Ре́ша в се́рдце свое́м ю́жики их вку́пе: прииди́те и отста́вим вся пра́здники Бо́жия от земли́. Зна́мения их не ви́дехом: несть ктому́ проро́ка, и нас не позна́ет ктому́. Доко́ле, Бо́же, поно́сит враг? Раздражи́т проти́вный и́мя Твое́ до конца́? Вску́ю отвраща́еши ру́ку Твою́ и десни́цу Твою́ от среды́ не́дра Твоего́ в коне́ц? Бог же Царь наш пре́жде ве́ка соде́ла спасе́ние посреде́ земли́. Ты утверди́л еси́ си́лою Твое́ю мо́ре, Ты сте́рл еси́ главы́ змие́в в воде́, Ты сокруши́л еси́ главу́ зми́еву, дал еси́ того́ бра́шно лю́дем Ефио́пским. Ты расто́ргл еси́ исто́чники и пото́ки, Ты изсуши́л еси́ ре́ки Ифа́мския. Твой есть день, и Твоя́ есть нощь: Ты соверши́л еси́ зарю́ и со́лнце. Ты сотвори́л еси́ вся преде́лы земли́, жа́тву и ве́сну Ты созда́л еси́ я́. Помяни́ сия́, враг поноси́ Го́сподеви, и лю́дие безу́мнии раздражи́ша и́мя Твое́. Не преда́ждь звере́м ду́шу, испове́дающуся Тебе́, душ убо́гих Твои́х не забу́ди до конца́. При́зри на заве́т Твой, я́ко испо́лнишася помраче́ннии земли́ домо́в беззако́ний. Да не возврати́тся смире́нный посра́млен, нищ и убо́г восхвали́та и́мя Твое́. Воста́ни, Бо́же, суди́ прю Твою́, помяни́ поноше́ние Твое́, е́же от безу́мнаго весь день. Не забу́ди гла́са моли́твенник Твои́х, горды́ня ненави́дящих Тя взы́де вы́ну.

Чтец: Сла́ва Отцу́ и Сы́ну и Свято́му Ду́ху.

Лик (хор): И ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 74

Испове́мыся Тебе́, Бо́же, испове́мыся Тебе́, и призове́м и́мя Твое́; пове́м вся чудеса́ Твоя́. Егда́ прииму́ вре́мя, Аз правоты́ возсужду́. Раста́яся земля́ и вси живу́щии на ней, Аз утверди́х столпы́ ея́. Рех беззако́ннующым, не беззако́ннуйте: и согреша́ющым, не возноси́те ро́га, не воздвиза́йте на высоту́ ро́га ва́шего, и не глаго́лите на Бо́га непра́вду: я́ко ниже́ от исхо́д, ниже́ от за́пад, ниже́ от пусты́х гор. Я́ко Бог судия́ есть: сего́ смиря́ет, и сего́ возно́сит. Я́ко ча́ша в руце́ Госпо́дни, вина́ нерастворе́на, испо́лнь растворе́ния, и уклони́ от сея́ в сию́: оба́че дро́ждие Его́ не истощи́ся, испию́т вси гре́шнии земли́. Аз же возра́дуюся в век, воспою́ Бо́гу Иа́ковлю: и вся ро́ги гре́шных сломлю́, и вознесе́тся рог пра́веднаго.

Псалом 75

Ве́дом во Иуде́и Бог: во Изра́или ве́лие и́мя Его́. И бысть в ми́ре ме́сто Его́ и жили́ще Его́ в Сио́не. Та́мо сокруши́ кре́пости луко́в, ору́жие и мечь и брань. Просвеща́еши Ты ди́вно от гор ве́чных. Смято́шася вси неразу́мнии се́рдцем: усну́ша сном свои́м, и ничто́же обрето́ша вси му́жие бога́тства в рука́х свои́х. От запреще́ния Твоего́, Бо́же Иа́ковль, воздрема́ша все́дшии на ко́ни. Ты стра́шен еси́, и кто противоста́нет Тебе́? Отто́ле гнев Твой. С небесе́ слы́шан сотвори́л еси́ суд: земля́ убоя́ся, и умолча́, внегда́ воста́ти на суд Бо́гу, спасти́ вся кро́ткия земли́. Я́ко помышле́ние челове́ческое испове́стся Тебе́: и оста́нок помышле́ния пра́зднует Ти. Помоли́теся и воздади́те Го́сподеви Бо́гу на́шему. Вси и́же о́крест Его́ принесу́т да́ры, стра́шному и отъе́млющему ду́хи князе́й, стра́шному па́че царе́й земны́х.

Псалом 76

Гла́сом мои́м ко Го́споду воззва́х, гла́сом мои́м к Бо́гу, и внят ми. В день ско́рби моея́ Бо́га взыска́х рука́ма мои́ма, но́щию пред Ним, и не прельще́н бых. Отве́ржеся уте́шитися душа́ моя́. Помяну́х Бо́га и возвесели́хся, поглумля́хся и малоду́шествоваше дух мой. Предвари́сте стражбы́ о́чи мои́: смято́хся и не глаго́лах. Помы́слих дни пе́рвыя, и ле́та ве́чная помяну́х, и поуча́хся: но́щию се́рдцем мои́м глумля́хся, и тужа́ше дух мой: еда́ во ве́ки отри́нет Госпо́дь, и не приложи́т благоволи́ти па́ки? Или́ до конца́ ми́лость Свою́ отсече́т, сконча́ глаго́л от ро́да в род? Еда́ забу́дет уще́дрити Бог? Или́ удержи́т во гне́ве Свое́м щедро́ты Своя́? И рех: ны́не нача́х, сия́ изме́на десни́цы Вы́шняго. Помяну́х дела́ Госпо́дня, я́ко помяну́ от нача́ла чудеса́ Твоя́, и поучу́ся во всех де́лех Твои́х, и в начина́ниих Твои́х поглумлю́ся. Бо́же, во святе́м путь Твой: кто Бог ве́лий я́ко Бог наш? Ты еси́ Бог творя́й чудеса́: сказа́л еси́ в лю́дех си́лу Твою́, изба́вил еси́ мы́шцею Твое́ю лю́ди Твоя́, сы́ны Иа́ковли и Ио́сифовы. Ви́деша Тя во́ды, Бо́же, ви́деша Тя во́ды, и убоя́шася: смято́шася бе́здны, мно́жество шу́ма вод, глас да́ша о́блацы, и́бо стре́лы Твоя́ прехо́дят. Глас гро́ма Твоего́ в колеси́, освети́ша мо́лния Твоя́ вселе́нную: подви́жеся и тре́петна бысть земля́. В мо́ри путие́ Твои́, и стези́ Твои́ в вода́х мно́гих, и следы́ Твоя́ не позна́ются. Наста́вил еси́ я́ко о́вцы лю́ди Твоя́ руко́ю Моисе́овою и Ааро́нею.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Го́споди, поми́луй. (Трижды)

И седален по 1-ом стихословии.

Глас 6: Кре́ст Тво́й, Го́споди, освяти́ся: те́м бо быва́ют исцеле́ния немощству́ющым грехми́: сего́ ра́ди Тебе́ припа́даем, поми́луй на́с.

Стих: Возноси́те Го́спода Бо́га на́шего, и покланя́йтеся подно́жию но́гу его́, я́ко свя́то е́сть.

То́кмо водрузи́ся Дре́во, Христе́, Креста́ Твоего́, основа́ния поколеба́шася сме́рти, Го́споди: Его́же бо пожре́ любо́вию а́д, отпусти́ трепе́щя, показа́л еси́ на́м спасе́ние Твое́, Святы́й: и славосло́вим Тя́, Сы́не Бо́жий, поми́луй на́с.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Крестобогородичен, глас 6: Наде́жде и заступле́ние и приста́нище люде́й Твои́х, Де́во, из Тебе́ бо роди́ся вои́стинну ми́ру спасе́ние. Я́коже пла́кася у Креста́ Твоего́ Сы́на и Бо́га, и спаса́еши упова́ющих на Тя́: того́ ны́не умоли́, изба́вити от тли́ все́х воспева́ющих Тя́.

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Кафизма 11

Псалом 77

Внемли́те, лю́дие мои́, зако́ну моему́, приклони́те у́хо ва́ше во глаго́лы уст мои́х. Отве́рзу в при́тчах уста́ моя́, провеща́ю гана́ния испе́рва. Ели́ка слы́шахом и позна́хом я́, и отцы́ на́ши пове́даша нам: не утаи́шася от чад их в род ин, возвеща́юще хвалы́ Госпо́дни и си́лы Его́, и чудеса́ Его́, я́же сотвори́. И воздви́же свиде́ние во Иа́кове, и зако́н положи́ во Изра́или: ели́ка запове́да отце́м на́шим, сказа́ти я́ сыново́м свои́м, я́ко да позна́ет род ин, сы́нове родя́щиися, и воста́нут и пове́дят я́ сыново́м свои́м: да положа́т на Бо́га упова́ние свое́, и не забу́дут дел Бо́жиих, и за́поведи Его́ взы́щут. Да не бу́дут я́коже отцы́ их, род стропти́в и преогорчева́яй, род и́же не испра́ви се́рдца своего́, и не уве́ри с Бо́гом ду́ха своего́. Сы́нове Ефре́мли наляца́юще и стреля́юще лу́ки, возврати́шася в день бра́ни: не сохрани́ша заве́та Бо́жия, и в зако́не Его́ не восхоте́ша ходи́ти. И забы́ша благодея́ния Его́, и чудеса́ Его́, я́же показа́ им пред отцы́ их, я́же сотвори́ чудеса́ в земли́ Еги́петстей, на по́ли Танео́се. Разве́рзе мо́ре, и проведе́ их, предста́ви во́ды я́ко мех. И наста́ви я́ о́блаком во дни, и всю нощь просвеще́нием огня́. Разве́рзе ка́мень в пусты́ни, и напои́ я́ я́ко в бе́здне мно́зе, и изведе́ во́ду из ка́мене, и низведе́ я́ко ре́ки во́ды. И приложи́ша еще́ согреша́ти Ему́, преогорчи́ша Вы́шняго в безво́дней; и искуси́ша Бо́га в сердца́х свои́х, вопроси́ти бра́шна душа́м свои́м. И клевета́ша на Бо́га, и ре́ша: еда́ возмо́жет Бог угото́вати трапе́зу в пусты́ни? Поне́же порази́ ка́мень, и потеко́ша во́ды, и пото́цы наводни́шася: еда́ и хлеб мо́жет да́ти, или́ угото́вати трапе́зу лю́дем Свои́м? Сего́ ра́ди слы́ша Госпо́дь и презре́: и огнь возгоре́ся во Иа́кове, и гнев взы́де на Изра́иля, я́ко не ве́роваша Бо́гови, ниже́ упова́ша на спасе́ние Его́. И запове́да облако́м свы́ше, и две́ри небесе́ отве́рзе, и одожди́ им ма́нну я́сти, и хлеб небе́сный даде́ им. Хлеб а́нгельский яде́ челове́к, бра́шно посла́ им до сы́тости. Воздви́же юг с небесе́, и наведе́ си́лою Свое́ю ли́ва, и одожди́ на ня я́ко прах пло́ти, и я́ко песо́к морски́й пти́цы перна́ты. И нападо́ша посреде́ ста́на их, о́крест жили́щ их. И ядо́ша и насы́тишася зело́, и жела́ние их принесе́ им. Не лиши́шася от жела́ния своего́: еще́ бра́шну су́щу во усте́х их: и гнев Бо́жий взы́де на ня, и уби́ мно́жайшая их, и избра́нным Изра́илевым запя́т. Во всех сих согреши́ша еще́, и не ве́роваша чудесе́м Его́. И исчезо́ша в суете́ дни́е их, и ле́та их со тща́нием. Егда́ убива́ше я́, тогда́ взыска́ху Его́, и обраща́хуся, и у́треневаху к Бо́гу: и помяну́ша, я́ко Бог Помо́щник им есть, и Бог Вы́шний Изба́витель им есть. И возлюби́ша Его́ усты́ свои́ми, и язы́ком свои́м солга́ша Ему́: се́рдце же их не бе пра́во с Ним, ниже́ уве́ришася в заве́те Его́. То́йже есть щедр, и очи́стит грехи́ их, и не растли́т, и умно́жит отврати́ти я́рость Свою́, и не разжже́т всего́ гне́ва Своего́. И помяну́, я́ко плоть суть, дух ходя́й и не обраща́яйся. Колькра́ты преогорчи́ша Его́ в пусты́ни, прогне́ваша Его́ в земли́ безво́дней? И обрати́шася, и искуси́ша Бо́га, и Свята́го Изра́илева раздражи́ша, и не помяну́ша руки́ Его́ в день, во́ньже изба́ви я́ из руки́ оскорбля́ющаго, я́коже положи́ во Еги́пте зна́мения Своя́, и чудеса́ Своя́ на по́ли Танео́се, и преложи́ в кровь ре́ки их, и исто́чники их, я́ко да не пию́т. Посла́ на ня пе́сия му́хи и поядо́ша я́: и жа́бы, и растли́ я́. И даде́ рже плоды́ их, и труды́ их пруго́м. Уби́ гра́дом виногра́ды их, и черни́чие их сла́ною, и предаде́ гра́ду скоты́ их, и име́ние их огню́. Посла́ на ня гнев я́рости Своея́, я́рость и гнев и скорбь, посла́ние А́нгелы лю́тыми. Путесотвори́ стезю́ гне́ву Своему́, и не пощаде́ от сме́рти душ их: и скоты́ их в сме́рти заключи́, и порази́ вся́кое перворо́дное в земли́ Еги́петстей, нача́ток вся́каго труда́ их в селе́ниих Ха́мовых. И воздви́же я́ко о́вцы лю́ди Своя́, и возведе́ я́ я́ко ста́до в пусты́ни, и наста́ви я́ на упова́ние, и не убоя́шася, и враги́ их покры́ мо́ре. И введе́ я́ в го́ру святы́ни Своея́, го́ру сию́, ю́же стяжа́ десни́ца Его́. И изгна́ от лица́ их язы́ки, и по жре́бию даде́ им [зе́млю] у́жем жребодая́ния, и всели́ в селе́ниих их коле́на Изра́илева. И искуси́ша и преогорчи́ша Бо́га Вы́шняго, и свиде́ний Его́ не сохрани́ша, и отврати́шася, и отверго́шася, я́коже и отцы́ их, преврати́шася в лук развраще́н, и прогне́ваша Его́ в хо́лмех свои́х и во истука́нных свои́х раздражи́ша Его́. Слы́ша Бог и презре́, и уничижи́ зело́ Изра́иля, и отри́ну ски́нию Сило́мскую, селе́ние, е́же всели́ся в челове́цех. И предаде́ в плен кре́пость их, и добро́ту их в ру́ки враго́в, и затвори́ во ору́жии лю́ди Своя́, и достоя́ние Свое́ презре́. Ю́ношы их пояде́ огнь, и де́вы их не осе́тованы бы́ша; свяще́нницы их мече́м падо́ша, и вдови́цы их не опла́каны бу́дут. И воста́ я́ко спя́ Госпо́дь, я́ко си́лен и шу́мен от вина́, и порази́ враги́ Своя́ вспять, поноше́ние ве́чное даде́ им. И отри́ну селе́ние Ио́сифово, и коле́но Ефре́мово не избра́, и избра́ коле́но Иу́дово, го́ру Сио́ню, ю́же возлюби́, и созда́ я́ко единоро́га святи́лище Свое́, на земли́ основа́ и́ в век. И избра́ Дави́да раба́ Своего́, и восприя́т eго́ от стад о́вчих. От дои́лиц поя́т eго́ пасти́ Иа́кова раба́ Своего́ и Изра́иля достоя́ние Свое́. И упасе́ я́ в незло́бии се́рдца своего́, и в ра́зумех руку́ свое́ю наста́вил я́ есть.

Чтец: Сла́ва Отцу́ и Сы́ну и Свято́му Ду́ху.

Лик (хор): И ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 78

Бо́же, приидо́ша язы́цы в достоя́ние Твое́, оскверни́ша храм святы́й Твой, положи́ша Иерусали́м я́ко ово́щное храни́лище, положи́ша тру́пия раб Твои́х бра́шно пти́цам небе́сным, пло́ти преподо́бных Твои́х звере́м земны́м. Пролия́ша кровь их я́ко во́ду о́крест Иерусали́ма, и не бе погреба́яй. Бы́хом поноше́ние сосе́дом на́шым, подражне́ние и поруга́ние су́щым о́крест нас. Доко́ле, Го́споди, прогне́ваешися до конца́? Разжже́тся я́ко огнь рве́ние Твое́? Проле́й гнев Твой на язы́ки не зна́ющыя Тебе́, и на ца́рствия, я́же и́мене Твоего́ не призва́ша, я́ко поядо́ша Иа́кова, и ме́сто eго́ опустоши́ша. Не помяни́ на́ших беззако́ний пе́рвых: ско́ро да предваря́т ны щедро́ты Твоя́, Го́споди, я́ко обнища́хом зело́. Помози́ нам, Бо́же, Спаси́телю наш, сла́вы ра́ди и́мене Твоего́, Го́споди, изба́ви ны, и очи́сти грехи́ на́ша и́мене ра́ди Твоего́. Да не когда́ реку́т язы́цы, где есть Бог их? И да уве́стся во язы́цех пред очи́ма на́шима отмще́ние кро́ве раб Твои́х пролиты́я. Да вни́дет пред Тя воздыха́ние окова́нных, по вели́чию мы́шцы Твоея́ снабди́ сы́ны умерщвле́нных. Возда́ждь сосе́дом на́шым седмери́цею в не́дро их поноше́ние их, и́мже поноси́ша Тя, Го́споди. Мы же, лю́дие Твои́ и о́вцы па́жити Твоея́, испове́мыся Тебе́, Бо́же, во век, в род и род возвести́м хвалу́ Твою́.

Псалом 79

Пасы́й Изра́иля вонми́: наставля́яй я́ко овча́ Ио́сифа, седя́й на Херуви́мех, яви́ся, пред Ефре́мом и Beниами́ном и Манасси́ем, воздви́гни си́лу Твою́, и прииди́ во е́же спасти́ нас. Бо́же, обрати́ ны, и просвети́ лице́ Твое́, и спасе́мся. Го́споди Бо́же Сил, доко́ле гне́ваешися на моли́тву раб Твои́х? Напита́еши нас хле́бом сле́зным, и напои́ши нас слеза́ми в ме́ру. Положи́л еси́ нас в пререка́ние сосе́дом на́шым, и врази́ на́ши подражни́ша ны. Го́споди Бо́же Сил, обрати́ ны, и просвети́ лице́ Твое́, и спасе́мся. Виногра́д из Еги́пта прене́сл еси́, изгна́л еси́ язы́ки, и насади́л еси́ и́. Путесотвори́л еси́ пред ним, и насади́л еси́ коре́ния eго́, и испо́лни зе́млю. Покры́ го́ры сень eго́, и ве́твия eго́ ке́дры Бо́жия; простре́ ро́зги eго́ до мо́ря, и да́же до рек о́трасли eго́. Вску́ю низложи́л еси́ опло́т eго́, и объима́ют и́ вси мимоходя́щии путе́м? Озоба́ и́ вепрь от дубра́вы, и уедине́нный ди́вий пояде́ и́. Бо́же Сил, обрати́ся у́бо, и при́зри с небесе́ и виждь, и посети́ виногра́д сей, и соверши́ и́, eго́же насади́ десни́ца Твоя́, и на сы́на челове́ческаго, eго́же укрепи́л еси́ Себе́. Пожже́н огне́м и раско́пан, от запреще́ния лица́ Твоего́ поги́бнут. Да бу́дет рука́ Твоя́ на му́жа десни́цы Твоея́, и на сы́на челове́ческаго, eго́же укрепи́л еси́ Себе́, и не отсту́пим от Тебе́; оживи́ши ны, и и́мя Твое́ призове́м. Го́споди Бо́же Сил, обрати́ ны, и просвети́ лице́ Твое́, и спасе́мся.

Псалом 80

Ра́дуйтеся Бо́гу, Помо́щнику на́шему, воскли́кните Бо́гу Иа́ковлю, приими́те псало́м и дади́те тимпа́н, псалти́рь красе́н с гу́сльми, воструби́те в новоме́сячии трубо́ю, во благознамени́тый день пра́здника ва́шего, я́ко повеле́ние Изра́илеви есть, и судьба́ Бо́гу Иа́ковлю. Свиде́ние во Ио́сифе положи́ е́, внегда́ изы́ти eму́ от земли́ Еги́петския, язы́ка eго́же не ве́дяше услы́ша. Отъя́т от бре́мене хребе́т eго́, ру́це eго́ в коши́ порабо́тасте. В ско́рби призва́л Мя еси́, и изба́вих тя, услы́шах тя в та́йне бу́рне, искуси́х тя на воде́ пререка́ния. Слы́шите, лю́дие мои́, и засвиде́тельствую вам, Изра́илю, а́ще послу́шаеши Мене́. Не бу́дет Тебе́ бог нов, ниже́ поклони́шися бо́гу чужде́му. Аз бо есмь Госпо́дь Бог твой, изведы́й тя от земли́ Еги́петския, разшири́ уста́ твоя́, и испо́лню я́. И не послу́шаша лю́дие мои́ гла́са Моего́, и Изра́иль не внят Ми: и отпусти́х я́ по начина́нием серде́ц их, по́йдут в начина́ниих свои́х. А́ще бы́ша лю́дие Мои́ послу́шали Мене́, Изра́иль а́ще бы в пути́ Моя́ ходи́л, ни о чесо́м же у́бо враги́ eго́ смири́л бых, и на оскорбля́ющыя их возложи́л бых ру́ку Мою́. Врази́ Госпо́дни солга́ша Eму́, и бу́дет вре́мя их в век. И напита́ их от ту́ка пшени́чна, и от ка́мене ме́да насы́ти их.

Чтец: Сла́ва Отцу́ и Сы́ну и Свято́му Ду́ху.

Лик (хор): И ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 81

Бог ста в со́нме бого́в, посреде́ же бо́ги разсу́дит. Доко́ле су́дите непра́вду, и ли́ца гре́шников прие́млете? Суди́те си́ру и убо́гу, смире́на и ни́ща оправда́йте. Изми́те ни́ща и убо́га, из руки́ гре́шничи изба́вите eго́. Не позна́ша, ниже́ уразуме́ша, во тьме хо́дят: да подви́жатся вся основа́ния земли́. Аз рех: бо́зи есте́, и сы́нове Вы́шняго вси. Вы же я́ко челове́цы умира́ете, и я́ко еди́н от князе́й па́даете. Воскресни́, Бо́же, суди́ земли́: я́ко Ты насле́диши во всех язы́цех.

Псалом 82

Бо́же, кто уподо́бится Тебе́? Не премолчи́ ниже́ укроти́, Бо́же. Я́ко се врази́ Твои́ возшуме́ша, и ненави́дящии Тя воздвиго́ша главу́. На лю́ди Твоя́ лука́вноваша во́лею, и совеща́ша на святы́я Твоя́. Ре́ша: прииди́те и потреби́м я́ от язы́к, и не помяне́тся и́мя Изра́илево ктому́. Я́ко совеща́ша единомышле́нием вку́пе, на Тя заве́т завеща́ша: селе́ния Идуме́йска, и Исма́илите, Моа́в и Ага́ряне: Гева́л и Аммо́н и Амали́к, иноплеме́нницы с живу́щими в Ти́ре, и́бо и Ассу́р прии́де с ни́ми, бы́ша в заступле́ние сыново́м Ло́товым. Сотвори́ им я́ко Мадиа́му и Сиса́ре, я́ко Иави́му в пото́це Ки́ссове. Потреби́шася во Аендо́ре, бы́ша я́ко гной земны́й. Положи́ кня́зи их, я́ко Ори́ва и Зи́ва, и Зеве́а и Салма́на, вся кня́зи их, и́же ре́ша: да насле́дим себе́ святи́лище Бо́жие. Бо́же мой, положи́ я́ я́ко ко́ло, я́ко трость пред лице́м ве́тра. Я́ко огнь попаля́яй дубра́вы, я́ко пла́мень пожига́яй го́ры, та́ко пожене́ши я́ бу́рею Твое́ю, и гне́вом Твои́м смяте́ши я́. Испо́лни ли́ца их безче́стия, и взы́щут и́мене Твоего́, Го́споди. Да постыдя́тся и смяту́тся в век ве́ка, и посра́мятся и поги́бнут. И да позна́ют, я́ко и́мя Тебе́ Госпо́дь, Ты еди́н Вы́шний по всей земли́.

Псалом 83

Коль возлю́бленна селе́ния Твоя́, Го́споди Сил! Жела́ет и скончава́ется душа́ моя́ во дворы́ Госпо́дни, се́рдце мое́ и плоть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́, олтари́ Твоя́, Го́споди Сил, Царю́ мой и Бо́же мой. Блаже́ни живу́щии в дому́ Твое́м, в ве́ки веко́в восхва́лят Тя. Блаже́н муж, eму́же есть заступле́ние eго́ у Тебе́; восхожде́ния в се́рдце свое́м положи́, во юдо́ль плаче́вную, в ме́сто е́же положи́, и́бо благослове́ние даст законополага́яй. По́йдут от си́лы в си́лу: яви́тся Бог бого́в в Сио́не. Го́споди Бо́же Сил, услы́ши моли́тву мою́, внуши́, Бо́же Иа́ковль. Защи́тниче наш, виждь, Бо́же, и при́зри на лице́ христа́ Твоего́. Я́ко лу́чше день еди́н во дво́рех Твои́х па́че ты́сящ: изво́лих примета́тися в дому́ Бо́га моего́ па́че, не́же жи́ти ми в селе́ниих гре́шничих. Я́ко ми́лость и и́стину лю́бит Госпо́дь, Бог благода́ть и сла́ву даст, Госпо́дь не лиши́т благи́х ходя́щих незло́бием. Го́споди Бо́же Сил, Блаже́н челове́к упова́яй на Тя.

Псалом 84

Благоволи́л еси́, Го́споди, зе́млю Твою́, возврати́л еси́ плен Иа́ковль: оста́вил еси́ беззако́ния люде́й Твои́х, покры́л еси́ вся грехи́ их. Укроти́л еси́ весь гнев Твой, возврати́лся еси́ от гне́ва я́рости Твоея́. Возврати́ нас, Бо́же спасе́ний на́ших, и отврати́ я́рость Твою́ от нас. Еда́ во ве́ки прогне́ваешися на ны? Или́ простре́ши гнев Твой от ро́да в род? Бо́же, Ты обра́щься оживи́ши ны, и лю́дие Твои́ возвеселя́тся о Тебе́. Яви́ нам, Го́споди, ми́лость Твою́, и спасе́ние Твое́ даждь нам. Услы́шу, что рече́т о мне Госпо́дь Бог: я́ко рече́т мир на лю́ди Своя́, и на преподо́бныя Своя́, и на обраща́ющыя сердца́ к Нему́. Оба́че близ боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и мир облобыза́стася. И́стина от земли́ возсия́, и пра́вда с небесе́ прини́че, и́бо Госпо́дь даст бла́гость, и земля́ на́ша даст плод свой. Пра́вда пред Ним предъи́дет, и положи́т в путь стопы́ своя́.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Го́споди, поми́луй. (Трижды)

И седален по 2-ом стихословии.

Глас 6: Дне́сь проро́ческое испо́лнися сло́во: се́ бо покланя́емся на ме́сте, иде́же стоя́сте но́зе Твои́, Го́споди: и Дре́ва спасе́ния вкуси́вше, от грехо́вных страсте́й свобо́ду улучи́хом, моли́твами Богоро́дицы, еди́не Человеколю́бче.

Стих: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Го́споди, осуди́ша Тя́ иуде́и на сме́рть, жи́знь все́х: и́же Чермно́е мо́ре жезло́м проше́дшии, ко кресту́ Тя пригвозди́ша: и от ка́мене ме́д сса́вшии, же́лчь Тебе́ принесо́ша. Но во́лею претерпе́л еси́, да на́с свободи́ши от рабо́ты вра́жия: Христе́ Бо́же на́ш, сла́ва Тебе́.

Стих: Ди́вен Бо́г во святы́х Свои́х, Бо́г Изра́илев.

Страда́льческая сопротивле́ния на суди́щи, мучи́тельския ра́ны на му́ченицех, и стоя́ху ли́цы безпло́тных, по́чести держа́ще побе́ды, удиви́ша мучи́тели и цари́, прему́дрии, низложи́ша престу́пника испове́данием Христо́вым: укрепи́вый и́х Го́споди, сла́ва Тебе́.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Крестобогородичен, глас 6: Предстоя́щи у Креста́ Неискусобра́чная Ма́ти, и́же из Тебе́ ро́ждшемуся без се́мене, вопия́ше: ору́жие се́рдце мое́ про́йде, о Сы́не, не терпя́щи ви́сима на Дре́ве Тя́ зре́ти, его́же трепе́щут вся́ческая, я́ко Созда́теля и Бо́га: долготерпели́ве Го́споди, сла́ва Тебе́.

Лик (хор): Го́споди, поми́луй. (Трижды)

Лик (хор): Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Песнь 1

Ирмос, глас 6: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Сла́ва, Го́споди, Кресту́ Твоему́ честно́му.

Ты́ дла́ни просте́р на Кресте́, объя́л еси́, Влады́ко, отринове́нныя челове́ки, и к Твоему́ приве́л еси́ Отцу́: я́ко Сы́н возлю́блен и единосу́щен.

Припев: Сла́ва, Го́споди, Кресту́ Твоему́ честно́му.

Я́коже а́гнец воздви́жен бы́л еси́ на Кре́ст, Сло́ве, Твоего́ овча́те ищя́ заблу́ждшаго: и обре́т сочета́л еси́ то́ к незаблу́ждшым, Иису́се: сла́ва держа́ве Твое́й.

Припев: Святи́и му́ченицы, моли́те Бо́га о нас.

Мученичен: Жи́зни вы́шния жела́юще, благосла́внии страстоте́рпцы му́ченицы, умертви́шася на земли́, претерпе́вше муче́ния мно́гая и разли́чныя напа́сти, достоблаже́ннии.

Припев: Святи́и му́ченицы, моли́те Бо́га о нас.

Мученичен: На суди́щах непра́ведных за Христа́ все́х пра́веднаго предста́вше страда́льцы, су́д вся́к непра́ведный ва́с оправда́ющ, о Бо́зе претерпе́ли есте́.

Припев: Пресвята́я Богоро́дице, спаси́ нас.

БогородиченПолный текст песнопения Да безстра́стие все́м, и́же из Ада́ма, исхода́тайствуеши, Влады́ко, стра́сть терпи́ши на Кресте́: и зря́щи Тя́ земля́ тряса́шеся, рыда́ющи ма́терски вопия́ше, Влады́чице.

Припев: Священному́чениче Анфи́ме, моли́ Бо́га о на́с.

Двоплете́н благоче́стия архиере́йства и страда́ния прие́м вене́ц,/ от Христа́ ублажа́ешися, пресла́вне.

Припев: Священному́чениче Анфи́ме, моли́ Бо́га о на́с.

Тебе́, Первопа́стырю,/ священноде́йственник Твой, я́ко незло́биво и чи́сто а́гня,/ беззако́нных рука́ми приведе́ся.

Припев: Священному́чениче Анфи́ме, моли́ Бо́га о на́с.

Разори́л еси́, иера́рше, еретико́в тве́ржы,/ благочести́вым дерзнове́нием,/ пропове́дав Тро́ицу несозда́нную.

Припев: Пресвята́я Богоро́дице, спаси́ нас.

БогородиченПолный текст песнопения Пречи́стая Богоро́дице,/ я́же воплоще́нное Присносу́щное и Пребоже́ственное Сло́во па́че естества́ ро́ждши,/ пое́м Тя.

Припев: Преподо́бне о́тче Феокти́сте, моли́ Бо́га о на́с.

Безстра́стия жела́нием сре́чемь, пло́ти взыгра́ния, о́тче, увяди́л еси́,/ Феокти́сте му́дре, Бо́гом помога́емь./ И ны́не нам све́та мы́сленнаго испо́лнитися/ помоли́ся Го́споду, пою́щим: сла́вно бо просла́вися.

Припев: Преподо́бне о́тче Феокти́сте, моли́ Бо́га о на́с.

Прилепи́вся тебе́ вели́кий Евфи́мий Боже́ственною, о́тче, любо́вию,/ и, спребыва́я, Феокти́сте, кре́пко,/ стезю́ воздержа́ния про́йде де́тельне и́стинно/ и тебе́ совзыва́ше:/ Го́споду пои́м, сла́вно бо просла́вися.

Сла́ва Отцу́, и Сы́ну, и Свято́му Ду́ху.

Подтесни́л еси́ те́ло, преблаже́нне,/ и стра́сти плотски́я, о́тче, порабо́тив, Феокти́сте,/ я́ко прия́л еси́ све́тлость благода́ти/ и, се́ю просвети́вся, боже́ственне взыва́л еси́:/ Го́споду пои́м, сла́вно бо просла́вися.

И ны́не, и при́сно, и во ве́ки веко́в. Ами́нь.

БогородиченПолный текст песнопения Тя спасе́ния наде́жду иму́ще, Де́во Ма́ти Бо́жия,/ Сло́во я́ко ро́ждшую, богоразу́мно прему́дрии в воздержа́нии просия́ша,/ Евфи́мий, любе́зный всем, и боже́ственный Феокти́ст,/ Го́споду зову́ще: сла́вно бо просла́вися.

Песнь 3

Ирмос, глас 6: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Сла́ва, Го́споди, Кресту́ Твоему́ честно́му.

Кре́ст водружа́шеся на земли́, и низпада́ше ле́сть, и тва́рь колеба́шеся, и сердца́ коле́блемая вра́жиими напа́стьми, утвержде́ние ве́рою приима́ху.

Припев: Сла́ва, Го́споди, Кресту́ Твоему́ честно́му.

Беси́вшеся непра́веднии лю́дие, Тебе́ пра́веднаго еди́наго осуди́ша на сме́рть, оправда́юща земны́я, и от непра́ведныя руки́ льсти́ваго си́х изъима́юща.

Припев: Святи́и му́ченицы, моли́те Бо́га о нас.

Мученичен: Подвиза́ше всю́ свою́ зло́бу льсти́вый, со святы́ми боря́ся: но побежда́шеся, зря́ непоко́ршихся те́х, и Боже́ственныя све́тлости о́бщников.

Припев: Святи́и му́ченицы, моли́те Бо́га о нас.

Мученичен: Теле́сная красота́ зе́льными изменя́шеся ра́нами, но облистава́ше па́че све́тлость душе́вная страстоте́рпец Христо́вых, де́йством Свята́го Ду́ха.

Припев: Пресвята́я Богоро́дице, спаси́ нас.

БогородиченПолный текст песнопения Кра́сна добро́тою Тя́ Сы́не, па́че все́х челове́к, внегда́ ражда́ти ми́ разуме́х: и ка́ко распина́емь ны́не, добро́ты не и́маши, Христе́, Де́во глаго́лаше слезя́щи.

Припев: Священному́чениче Анфи́ме, моли́ Бо́га о на́с.

Яви́лся еси́ священному́ченик,/ священноде́йствуя пе́рвее, преподо́бне, Изба́вителю:/ пото́м же я́ко же́ртву себе́ сама́го священноде́йствовал еси́.

Припев: Священному́чениче Анфи́ме, моли́ Бо́га о на́с.

Был еси́ не нае́мник, но ве́рнейший па́стырь, преподо́бне,/ твою́ кровь пролива́я, боголюбе́зне, за ста́до твое́.

Припев: Священному́чениче Анфи́ме, моли́ Бо́га о на́с.

Изря́дне упа́сл еси́ Влады́ки твоего́ ста́до, архиере́е,/ тем на ме́сте зла́чне всели́лся еси́.

Припев: Пресвята́я Богоро́дице, спаси́ нас.

БогородиченПолный текст песнопения Даждь нам по́мощь мольба́ми Твои́ми, Пречи́стая,/ прило́ги отрева́ющи лю́тых обстоя́ний.

Припев: Преподо́бне о́тче Феокти́сте, моли́ Бо́га о на́с.

Плоть у́бо умертви́л еси́ твою́ воздержа́нием, преподо́бне,/ ду́шу же Боже́ственных благода́тей дарова́ньми просвети́л еси́.

Припев: Преподо́бне о́тче Феокти́сте, моли́ Бо́га о на́с.

Плоть у́бо умертви́л еси́ твою́ воздержа́нием, преподо́бне,/ ду́шу же Боже́ственных благода́тей дарова́ньми просвети́л еси́.

Сла́ва Отцу́, и Сы́ну, и Свято́му Ду́ху.

Все у́бо жела́ние ко Влады́це твоему́ обрати́л еси́,/ я́ростию же на де́моны, богоно́се, вооружи́лся еси́.

И ны́не, и при́сно, и во ве́ки веко́в. Ами́нь.

БогородиченПолный текст песнопения Пе́ния воспева́юще, богонауче́ннии, Влады́чице,/ Тя по́стницы, я́ко Бо́га ро́ждшую,/ Богоро́дицу просла́виша.

Катавасия

Ирмос, глас 8: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Седален

сщмч. Анфи́ма, епископа Никомидийскаго, и с ним мчч. Фео́фила, диакона, Дорофе́я, Мардо́ния, Мигдо́ния, диакона, Петра, Инди́са, Горго́ния, Зино́на, До́мны девы и Евфи́мия Глас 1: Кровь твоя́, му́дре, та́йно вопия́ше от земли́ к Бо́гу, я́ко А́велева, богому́дре:/ я́ве бо пропове́дал еси́ Тро́ицу Несозда́нную./ Те́мже, Анфи́ме, па́стырски просия́в,/ отгна́л еси́ ересе́й зве́ри, я́ко храни́тель ве́ры.

Сла́ва Отцу́, и Сы́ну, и Свято́му Ду́ху.

прп. Феокти́ста Палестинскаго, спостника Евфимия Великаго, игумена Глас 4: Отце́в нача́льник наре́клся еси́ и ми́ру был еси́ пресве́тлое свети́ло,/ преподо́бне о́тче Феокти́сте./ Тем непреста́нно чтим па́мять твою́.

И ны́не, и при́сно, и во ве́ки веко́в. Ами́нь.

Крестобогородичен, глас 4: На Дре́ве ви́дящи воздви́жена Сы́на Твоего́, Пречи́стая/ утро́бою Ма́тернею растерза́ема, жа́лостно вопия́ла еси́:/ увы́ Мне, ка́ко заше́л еси́,/ Све́те Мой Безле́тный?

Песнь 4

Ирмос, глас 6: Христо́с моя́ си́ла, Бо́г и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Припев: Сла́ва, Го́споди, Кресту́ Твоему́ честно́му.

Распя́та на Дре́ве Тя́, Со́лнце незаходи́мое, Христе́, зря́ со́лнце помрача́шеся стра́хом, и те́мныя пре́лести отпуще́на быва́ше вся́ тва́рь, воспева́ющая Тя́.

Припев: Сла́ва, Го́споди, Кресту́ Твоему́ честно́му.

Вяза́ху ру́це Твои́, Спа́се, лю́дие законопресту́пнии, и свя́заннии нереши́мых у́з вси́ отпуща́еми быва́ху: и свя́зан быва́ше вра́г, и ле́сть разруша́шеся.

Припев: Святи́и му́ченицы, моли́те Бо́га о нас.

Мученичен: Тече́нием крове́й потопи́сте му́ченицы фарао́на гони́теля, умовре́дно безме́рно хва́лящася: и к земли́ благо́й веселя́щеся преидо́сте.

Припев: Святи́и му́ченицы, моли́те Бо́га о нас.

Мученичен: Крила́ми ду́ха прелете́вше се́ти вра́жия страда́льцы, ра́дующеся востеко́сте, иде́же пе́рвая бла́гость, и жи́знь, и све́т невече́рний.

Припев: Пресвята́я Богоро́дице, спаси́ нас.

БогородиченПолный текст песнопения Ору́жием уязви́лася еси́ страсте́й, Влады́чице. Из Тебе́ воплоти́вшагося, егда́ того́ ви́дела еси́ распина́ема, и копие́м в пречи́стая ре́бра на́с ра́ди пробода́ема.

Припев: Священному́чениче Анфи́ме, моли́ Бо́га о на́с.

Волко́в собо́рища а́гнцы творя́ сло́вом, блаже́нне,/ умертви́лся еси́ те́лом,/ дух же пре́дал еси́ Го́споду.

Припев: Священному́чениче Анфи́ме, моли́ Бо́га о на́с.

Я́ко благово́нная и всечестна́я,/ Всецарю́ прия́тна же́ртва твоя́,/ и принося́щаго в богому́дрии,/ и приноша́емаго пребеззако́нными рука́ми.

Припев: Священному́чениче Анфи́ме, моли́ Бо́га о на́с.

Пома́зался еси́ у́бо, преподо́бне,/ свяще́нническою ма́стию пе́рвее,/ соверши́лся же еси́ второ́е страда́льческою твое́ю, о́тче, кро́вию.

Припев: Пресвята́я Богоро́дице, спаси́ нас.

БогородиченПолный текст песнопения Очище́ние нам да́руй неве́дений, я́ко Безгре́шен,/ и умири́ мир Твой, Бо́же,/ моли́твами Ро́ждшия Тя.

Припев: Преподо́бне о́тче Феокти́сте, моли́ Бо́га о на́с.

Прему́дрости пе́рвый ты рачи́тель яви́лся еси́, прему́дре;/ житие́ бо непоро́чно пожи́л еси́,/ очище́н изря́дне душе́ю и мы́слию, согла́сно взыва́я:/ сла́ва си́ле Твое́й, Го́споди.

Припев: Преподо́бне о́тче Феокти́сте, моли́ Бо́га о на́с.

Очи́стив ум твой от страстны́я молвы́, сла́вне,/ и чу́вства му́дре упра́вив,/ к нему́тней тишине́, о́тче, устреми́лся еси́, усе́рдно воспева́я:/ сла́ва си́ле Твое́й, Го́споди.

Сла́ва Отцу́, и Сы́ну, и Свято́му Ду́ху.

Земны́я печа́ли воздержа́тельно оттря́с,/ Небе́сныя наде́жди стяжа́ Твой уго́дник, Влады́ко,/ боже́ственный Феокти́ст со Евфи́мием, поя́:/ сла́ва си́ле Твое́й, Го́споди.

И ны́не, и при́сно, и во ве́ки веко́в. Ами́нь.

БогородиченПолный текст песнопения Я́ко яви́лся еси́ в ми́ре от Де́вы, я́ко Челове́к,/ дарова́л еси́ побе́ду преподо́бным Твои́м:/ Твои́м бо Кресто́м де́моны си́и прогна́ша,/ ве́рою зову́ще: сла́ва си́ле Твое́й, Го́споди.

Песнь 5

Ирмос, глас 6: Бо́жиим све́том Твои́м бла́же, у́тренюющих Ти́ ду́ши любо́вию озари́ молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Сла́ва, Го́споди, Кресту́ Твоему́ честно́му.

Облача́яй не́бо о́блаки, Христе́, на Кресте́ на́г пригвозди́лся еси́ во́лею, наготу́ зло́бы моея́ приодева́яй, и в ри́зы нетле́ния обле́к просвеща́я, Влады́ко.

Припев: Сла́ва, Го́споди, Кресту́ Твоему́ честно́му.

На Кресте́ ра́спят бы́сть и́стинный виногра́д Христо́с, я́ко вои́стинну сы́й сла́дость душа́м на́шым, мсто́ иска́пая, пре́лести вся́кое пия́нство бори́теля потребля́я.

Припев: Святи́и му́ченицы, моли́те Бо́га о нас.

Мученичен: Испещре́ннии свяще́нными я́звами Христо́вы страда́льцы, и венцы́ украша́емии, пло́тию пострада́вшему Бо́гу предстоя́ще, на́ших прегреше́ний разреше́ние про́сят.

Припев: Святи́и му́ченицы, моли́те Бо́га о нас.

Мученичен: Взира́юще страстоте́рпцы к та́мошней сла́ве, и жи́зни, и и́стинному весе́лию, вся́ко треволне́ние лю́тых подъя́сте, стра́стию влады́чнею укрепля́еми.

Припев: Пресвята́я Богоро́дице, спаси́ нас.

БогородиченПолный текст песнопения Во чре́во вмести́вшая Тя́, Христе́, Еди́наго невмести́маго все́ми, боле́зней кроме́ породи́х: ны́не же боле́зную, распина́ему Ти́, Христе́, Пречи́стая Де́ва пла́чущи глаго́лаше.

Припев: Священному́чениче Анфи́ме, моли́ Бо́га о на́с.

Безкро́вну Же́ртву прине́сл еси́ Го́споду,/ сама́го же себе́ кро́вию плодоприне́сл еси́, Анфи́ме.

Припев: Священному́чениче Анфи́ме, моли́ Бо́га о на́с.

Дух тя Боже́ственный просвети́, иера́рше;/ тем пресла́вную торжеству́ем па́мять твою́.

Припев: Священному́чениче Анфи́ме, моли́ Бо́га о на́с.

Боже́ственный у́бо твой язы́к иска́па спасе́ние,/ ток же кро́ве твоея́ духо́вное ра́дование.

Припев: Пресвята́я Богоро́дице, спаси́ нас.

БогородиченПолный текст песнопения Ути́ши непостоя́нную бу́рю страсте́й мои́х,/ Бо́га Ро́ждшая Ко́рмчию и Го́спода.

Припев: Преподо́бне о́тче Феокти́сте, моли́ Бо́га о на́с.

Умертви́ на́ша мудрова́ния, Человеколю́бче,/ и плотска́я взыгра́ния/ благоприя́тными преподо́бнаго Твоего́ моли́твами.

Припев: Преподо́бне о́тче Феокти́сте, моли́ Бо́га о на́с.

Умертви́ на́ша мудрова́ния, Человеколю́бче,/ и плотска́я взыгра́ния/ благоприя́тными преподо́бнаго Твоего́ моли́твами.

Сла́ва Отцу́, и Сы́ну, и Свято́му Ду́ху.

Свы́ше нас назира́еши, всеблаже́нне,/ и управляевши житие́ на́ше,/ соверша́ющих любо́вию, му́дре, па́мять твою́.

И ны́не, и при́сно, и во ве́ки веко́в. Ами́нь.

БогородиченПолный текст песнопения Сообита́тельная дво́ица,/ преизря́дная и богозва́нная,/ воплоще́ннаго из Де́вы Чи́стыя/ Бо́га пропове́дует, неизрече́нно нам возсия́вшаго.

Песнь 6

Ирмос, глас 6: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.

Припев: Сла́ва, Го́споди, Кресту́ Твоему́ честно́му.

Венча́лся еси́, Долготерпели́ве, те́рнием, посека́я страсте́й те́рние: копие́м в ре́бра прободе́н бы́в, умертви́л еси́ зми́я многоко́зненнаго, на́с ме́ртвы соде́лавшаго.

Припев: Сла́ва, Го́споди, Кресту́ Твоему́ честно́му.

На Кре́ст воздви́жен бы́л еси́, низлага́я вра́жию си́лу, Влады́ко: рабо́ты же го́рькия мене́ свобожда́я, прия́т зауше́ние: покланя́юся Твоему́, Ще́дре, долготерпе́нию.

Припев: Святи́и му́ченицы, моли́те Бо́га о нас.

Мученичен: Кресто́м огражда́еми страда́льцы, пре́лести сте́ны лука́выя разверго́ша, и к вы́шнему гра́ду пресели́шася, побе́дными венцы́ укра́шени. Те́мже ублажа́еми су́ть.

Припев: Святи́и му́ченицы, моли́те Бо́га о нас.

Мученичен: На высоту́ пресла́вно муче́ния са́ми себе́ возве́дше святи́и, лука́вая возноше́ния вра́жия на зе́млю низверго́сте, и венцы́ свы́ше прия́сте.

Припев: Пресвята́я Богоро́дице, спаси́ нас.

БогородиченПолный текст песнопения О́тчее сия́ние, ка́ко воздви́жеся на Кре́ст, просвеща́я вся́ческая, и низлага́я тьмы́ нача́льника? Пречи́стая Влады́чица ма́терски пла́чущи веща́ше.

Припев: Священному́чениче Анфи́ме, моли́ Бо́га о на́с.

Крести́л еси́ водо́ю лю́ди и Святы́м Ду́хом,/ я́коже крести́лся еси́,/ крести́лся же еси́ и твое́ю, о́тче, кро́вию.

Припев: Священному́чениче Анфи́ме, моли́ Бо́га о на́с.

Я́ко розга́ Лозы́ жи́зненныя,/ избра́н и че́стен,/ мно́жайший израсти́л еси́ Влады́це твоему́ плод, всеблаже́нне.

Припев: Священному́чениче Анфи́ме, моли́ Бо́га о на́с.

Не преста́й, моле́ния творя́ ко Христу́, блаже́нне,/ о ста́де твое́м/ и кровь предложи́в моле́бную.

Припев: Пресвята́я Богоро́дице, спаси́ нас.

БогородиченПолный текст песнопения Храм Тя Бо́жий, и киво́т,/ и черто́г одушевле́н,/ и дверь Небе́сную,/ Богоро́дице, ве́рнии, возвеща́ем.

Припев: Преподо́бне о́тче Феокти́сте, моли́ Бо́га о на́с.

Я́ко со́лнце, су́щим на земли́ возсия́л еси́,/ све́том благоче́стия просвеща́я/ и доброде́телей разсева́я сия́ние,/ и целому́дрия уча́ све́тлости, Феокти́сте,/ твои́ми моли́твами и ны́не вселе́нную умири́.

Припев: Преподо́бне о́тче Феокти́сте, моли́ Бо́га о на́с.

Я́ко со́лнце, су́щим на земли́ возсия́л еси́,/ све́том благоче́стия просвеща́я/ и доброде́телей разсева́я сия́ние,/ и целому́дрия уча́ све́тлости, Феокти́сте,/ твои́ми моли́твами и ны́не вселе́нную умири́.

Сла́ва Отцу́, и Сы́ну, и Свято́му Ду́ху.

Богому́дрым по́мыслом ублажи́вся,/ я́же на земли́ преоби́дел еси́ вся,/ и Небе́сное, преблаже́нне о́тче, насле́дие, всему́дре,/ предразсуди́л еси́, Феокти́сте,/ и ны́не я́ве на Небесе́х живе́ши, ра́дуяся.

И ны́не, и при́сно, и во ве́ки веко́в. Ами́нь.

БогородиченПолный текст песнопения Привлеко́стеся добро́тою любве́ Христо́вы, благоле́пныя и Боже́ственныя,/ пло́тию я́вльшагося в ми́ре от Святы́я Чи́стыя Богома́тере,/ и яви́стеся мона́хов изве́стнаго жития́ прописа́ния.

Катавасия

Ирмос, глас 8: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Кондак

Конда́к священному́ченика Анфи́маГлас 4: Во свяще́нницех благоче́стно пожи́в/ и муче́ния путь сконча́в,/ и́дольская угаси́л еси́ служе́ния,/ побо́рник быв твоему́ ста́ду, богому́дре./ Те́мже тя и почита́ет ны́не, та́йно вопию́ще:/ от бед изба́ви нас/ твои́ми моли́твами, приснопа́мятне Анфи́ме.

Икос: Пода́в мне зна́ние Боже́ственное,/ мрак неве́дения от моего́ се́рдца отжени́ моли́твами твои́ми,/ я́ко да пою́ твою́ ве́рно святу́ю па́мять,/ в не́йже а́нгельстии ли́цы с му́ченическими днесь веселя́тся Боже́ственне/ и челове́цы пе́сньми похва́льными твою́ главу́, я́коже цве́ты спле́тше, венча́ют досто́йно,/ прося́ще от Тебе́ прия́ти согреше́ний оставле́ние/ и злых жития́ реше́ние,/ враго́в же ви́димых изба́витися и неви́димых/ твои́ми моли́твами, о́тче наш Анфи́ме.

Песнь 7

Ирмос, глас 6: Росода́тельну у́бо пе́щь соде́ла А́нгел, преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Сла́ва, Го́споди, Кресту́ Твоему́ честно́му.

Ядови́тую зауши́л еси́ зми́я зло́бу, зауше́н бы́в, пове́шен на дре́ве еди́не си́льне, все́х просвети́л еси́ вопи́ти: благослове́н еси́, Бо́же оте́ц на́ших.

Припев: Сла́ва, Го́споди, Кресту́ Твоему́ честно́му.

От Дре́ва вку́ш Ада́м пе́рвый челове́к, обре́те сме́рть: вторы́й же на не́м Христо́с, умертви́вся, безсме́ртную жи́знь да́рует, умертви́в врага́ многоко́зненнаго.

Припев: Святи́и му́ченицы, моли́те Бо́га о нас.

Мученичен: Терпя́ще стра́сть му́ченицы, муче́нием Го́сподеви возведо́стеся, и на ка́мени ста́сте тве́рдем ве́ры, вся́ку лука́вую низлага́юще зло́бу вра́жию Боже́ственным манове́нием.

Припев: Святи́и му́ченицы, моли́те Бо́га о нас.

Мученичен: Просвети́вшеся страда́ньми, страда́льцы облиста́ете со́лнца светле́йше, и тьмы́ вла́сти вся́ разруши́сте, пою́ще Христо́ви: благослове́н Бо́г оте́ц на́ших.

Припев: Пресвята́я Богоро́дице, спаси́ нас.

БогородиченПолный текст песнопения И́же сы́й неизме́нен Божество́м, измени́л еси́ пове́шен на Кресте́ тва́рь всю́, Де́ва глаго́лаше Сы́ну: и зря́щи сия́ пла́каше, дивя́щися мно́гому Твоему́ долготерпе́нию.

Припев: Священному́чениче Анфи́ме, моли́ Бо́га о на́с.

Я́ко до́брая и я́ко ту́чная же́ртва твоя́ яви́ся, преблаже́нне Анфи́ме:/ Самому́ бо Влады́це кро́вию прине́слся еси́,/ принося́й Безкро́вная,/ отце́в, вопия́, Бо́же, благослове́н еси́.

Припев: Священному́чениче Анфи́ме, моли́ Бо́га о на́с.

Пасы́йся и упа́с,/ отобою́ду, о́тче, бога́тство собра́л еси́,/ и, сие́ снабде́в, соблю́л еси́ печа́тию страда́ния,/ поя́ Христу́: отце́в на́ших Бо́же, благослове́н еси́.

Припев: Священному́чениче Анфи́ме, моли́ Бо́га о на́с.

В ве́рных це́ркви Триипоста́сное Естество́ богосло́вил еси́/ и, пред се́ю, богоно́се, непра́ведных судо́м убива́емь,/ пел еси́: отце́в на́ших Бо́же, благослове́н еси́.

Припев: Пресвята́я Богоро́дице, спаси́ нас.

БогородиченПолный текст песнопения От де́вственнаго чре́ва вопло́щься яви́лся еси́ на спасе́ние на́ше./ Те́мже, Твою́ Ма́терь ве́дуще Богоро́дицу,/ благода́рно взыва́ем: отце́в на́ших Бо́же, благослове́н еси́.

Припев: Преподо́бне о́тче Феокти́сте, моли́ Бо́га о на́с.

Всем жела́нием прилепи́вся воздержа́нием тве́рдым твоему́ Влады́це,/ Того́ ны́не пита́ешися сия́нии, зовы́й:/ благослове́н еси́, Го́споди Бо́же, во ве́ки.

Припев: Преподо́бне о́тче Феокти́сте, моли́ Бо́га о на́с.

Плод боже́ствен Влады́це прине́сл еси́ житие́ твое́, треблаже́нне,/ и же́ртву прия́тну и непоро́чну, зовы́й:/ благослове́н еси́, Го́споди Бо́же, во ве́ки.

Сла́ва Отцу́, и Сы́ну, и Свято́му Ду́ху.

Коне́ц боле́зней обре́л еси́, о́тче, наслажде́ние е́же в раи́,/ от те́снаго бо пути́ дости́гл еси́ к простра́нству Ца́рствия, всему́дре,/ благословя́ Христа́ во ве́ки.

И ны́не, и при́сно, и во ве́ки веко́в. Ами́нь.

БогородиченПолный текст песнопения Се Де́ва Боже́ственное Отроча́ породи́,/ Его́же ны́не богоно́снии позна́вше Бо́га и Го́спода, вопия́ху:/ благослове́н еси́, Го́споди Бо́же, во ве́ки.

Песнь 8

Ирмос, глас 6: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Сла́ва, Го́споди, Кресту́ Твоему́ честно́му.

Прего́рдаго зми́я Ты́ смири́л еси́, Вы́шний Бо́же, смире́нием се́рдца возноси́мь на Дре́во, и Ада́ма страстьми́ смире́ннаго возне́сл еси́, Ще́дре.

Припев: Сла́ва, Го́споди, Кресту́ Твоему́ честно́му.

Дре́внюю го́ресть претворя́яй на Дре́во вознесе́н бы́л еси́, же́лчь вкуша́я, все́х сла́досте и жи́знь единоипоста́сная сы́й Влады́ко, и све́т и спасе́ние.

Припев: Святи́и му́ченицы, моли́те Бо́га о нас.

Мученичен: Не преклони́сте коле́н истука́нным, всехва́льнии, но поже́рти бы́сте я́ко а́гнцы непоро́чнии: и лука́ваго кре́пость преклони́сте, песносло́вяще Христа́ во ве́ки.

Припев: Святи́и му́ченицы, моли́те Бо́га о нас.

Мученичен: Хра́мы Ду́ха Жива́го яви́стеся му́ченицы, хра́мы и́дольския низложи́сте, и к Хра́му Небе́сному взя́ти бы́сте, песносло́вяще Христа́ во ве́ки.

Припев: Пресвята́я Богоро́дице, спаси́ нас.

БогородиченПолный текст песнопения Иа́ков Тя́ предви́де, Де́во, ле́ствицу, к небе́сней высоте́ на́с возводя́щую, во глубину́ злы́х попо́лзшихся: те́мже Чи́стую Тя́ благослови́м во ве́ки.

Припев: Священному́чениче Анфи́ме, моли́ Бо́га о на́с.

Священному́ченика благосла́внаго в па́мяти,/ ве́рнии, весели́теся, вопию́ще:/ Тя превозно́сим, Христе́, во ве́ки.

Припев: Священному́чениче Анфи́ме, моли́ Бо́га о на́с.

Иера́рха му́ченическим зря́ще благоле́пно укра́шена венце́м,/ Го́спода пое́м и превозно́сим во ве́ки.

Припев: Священному́чениче Анфи́ме, моли́ Бо́га о на́с.

Тро́ицы уго́дника/ и кровь Тоя́ ра́ди излия́вшаго почти́м,/ Го́спода пою́ще и превознося́ще во вся ве́ки.

Припев: Пресвята́я Богоро́дице, спаси́ нас.

БогородиченПолный текст песнопения Свеща́тельну Тя и златоза́рну/ всели́выйся в Тя Свет Непристу́пный, Де́во,/ показа́ свещу́ во вся ве́ки.

Припев: Преподо́бне о́тче Феокти́сте, моли́ Бо́га о на́с.

С похвала́ми быва́ет, богоно́се, па́мять твоя́:/ пра́вды бо яви́лся еси́ пита́тель,/ му́жества, му́дрости и целому́дрия, о́тче му́дре,/ Соде́телю и Изба́вителю взыва́я:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Припев: Преподо́бне о́тче Феокти́сте, моли́ Бо́га о на́с.

Богоно́снаго вси благохвале́ньми почти́м,/ я́ко испо́лнена я́ве благода́ти/ и Боже́ственными сия́ньми просвеще́на изря́дне,/ Соде́телю и Изба́вителю вопию́ща:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Благослови́м Отца́ и Сы́на и Свята́го Ду́ха, Го́спода.

Во гро́бе те́ло твое́ святи́тель погребе́/ и благоду́шия све́тлый тезоимени́т:/ ду́шу же Ангели на Небеса́ принесо́ша,/ Соде́телю ра́достно песнопою́ще:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

И ны́не, и при́сно, и во ве́ки веко́в. Ами́нь.

БогородиченПолный текст песнопения Любому́дрствовати вожделе́вше, Му́дрости жела́нием Ипоста́сныя, по́стницы богому́дрии,/ ми́ру, Всенепоро́чная, я́вльшияся, Отрокови́це, из Тебе́/ и боголе́пно доброде́тели насади́вшияся,/ Ю́же де́ти благосло́вят, свяще́нницы пою́т,/ лю́дие превозно́сят во вся ве́ки.

Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия

Ирмос, глас 8: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Песнь 9

Ирмос, глас 6: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и, Тя́ ублажа́ем.

Припев: Сла́ва, Го́споди, Кресту́ Твоему́ честно́му.

Времено́м и ле́том сы́й Госпо́дь, посреде́ земли́ в полу́дне на Дре́во возне́слся еси́, распина́емь Еди́не Долготерпели́ве, и посреде́ рая́ претерпе́вшаго поползнове́ние, пло́д тлетво́рный исправля́я.

Припев: Сла́ва, Го́споди, Кресту́ Твоему́ честно́му.

Кре́ст водружа́шеся, и мучи́тель в души́ сме́ртную я́зву приима́ше, и свя́заннии от тли́ отреша́еми быва́ху: ра́зум же во вся́ челове́ки всажда́шеся, вра́г упражня́шеся, и ра́дости вся́ исполня́хуся.

Припев: Святи́и му́ченицы, моли́те Бо́га о нас.

Мученичен: Земля́ совокупи́ся, Госпо́дни му́ченицы, с небесы́ отне́леже Христо́с пожре́ся, распина́емь: и ва́ше мно́жество привлече́, мно́жество зе́льных му́к претерпе́вшыя, и мно́жеству Боже́ственных слу́г сооблиста́вшыя.

Припев: Святи́и му́ченицы, моли́те Бо́га о нас.

Мученичен: Све́том невеще́ственным облиста́еми, положе́нием бо́зи бы́сте Госпо́дни му́ченицы, в перворо́дных селе́ниих водворя́еми, и ве́чныя сла́вы исполня́еми: те́мже по до́лгу ве́рнии ва́с почита́ем.

Припев: Пресвята́я Богоро́дице, спаси́ нас.

БогородиченПолный текст песнопения Стра́шно рождество́ претерпе́х, Влады́ко, внегда́ стра́нно Тебе́ роди́х Долготерпели́ве, Его́же тва́рь распина́ема на Дре́ве во́лею, зря́щи устраши́ся, дре́вле Непоро́чная пла́каше вопию́щи ма́терски, Ю́же велича́ем.

Припев: Священному́чениче Анфи́ме, моли́ Бо́га о на́с.

Ты у́бо овца́м па́стырь ве́рен показа́лся еси́,/ Па́стырю же овча́ приве́лся еси́ на же́ртву/ и сугу́бу прия́л еси́ сла́ву:/ тем тя честву́юще ублажа́ем.

Припев: Священному́чениче Анфи́ме, моли́ Бо́га о на́с.

Ты начерта́ния воздержа́нием, преблаже́нне,/ благоче́стия шары́ себе́ вообрази́в,/ и́стинно по Бо́жию о́бразу ду́шу твою́ показа́л еси́, блаже́нне.

Припев: Священному́чениче Анфи́ме, моли́ Бо́га о на́с.

Твоя́ преда́ния, о́тче, невре́дна соблюда́юще/ и страда́ние честву́юще,/ благоче́стно Тро́ицу во Еди́ном Божества́ Естестве́/ пе́сньми непреста́нно блажи́м.

Припев: Пресвята́я Богоро́дице, спаси́ нас.

БогородиченПолный текст песнопения Противля́ющихся, Христе́, Твое́й Це́ркви/ мы́шцы сокруши́ Богоро́дицы ра́ди/ и ве́рныя лю́ди Твоя́ утверди́, да Тя непреста́нно велича́ем.

Припев: Преподо́бне о́тче Феокти́сте, моли́ Бо́га о на́с.

Струя́ми твои́х слез очи́стився,/ ны́не Све́та наслажда́ешися, Феокти́сте, Трисия́ннаго,/ Тому́ предстоя́ я́ве и отону́дными изря́днейше просвеще́н луча́ми,/ свы́ше назира́еши нас, твою́ па́мять соверша́ющих, всеблаже́нне.

Припев: Преподо́бне о́тче Феокти́сте, моли́ Бо́га о на́с.

Любо́вию и наде́ждею вооружи́вся и ве́рно огражде́н,/ разори́л еси́ хи́трости и кова́рства вра́жия/ и, победи́тель быв, ны́не венцено́сец живе́ши/ с Боже́ственными ли́ки А́нгел и преподо́бных о́крест Престо́ла Всецаря́.

Сла́ва Отцу́, и Сы́ну, и Свято́му Ду́ху.

Целому́дренно и пра́ведно и благочести́во на земли́ с челове́ки пожи́вше,/ на Небесе́х сия́ете, богому́дрии по́стницы, со безпло́тных чи́нми,/ Заре́ю пита́ющеся Богонача́льною,/ от Нея́же и по́двигов пра́ведно венцы́, я́ко победоно́сцы, прия́сте.

И ны́не, и при́сно, и во ве́ки веко́в. Ами́нь.

БогородиченПолный текст песнопения Боже́ственная и богому́драя и свяще́нная дво́ице отце́в пресве́тлая,/ ва́шими мольба́ми ми́ру мир от Бо́га низпосла́тися проси́те/ и Це́рквам и́стинно единоу́мие и ве́ру,/ моли́твами благоприя́тными Богоро́дицы, преблаже́ннии.

Катавасия

Ирмос, глас 8: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// Ангелов и челове́к чинонача́лия велича́ют.

Досто́йно есть...

Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.

Cветильны

Кре́ст — храни́тель всея́ вселе́нныя, кре́ст — красота́ це́ркве, кре́ст — ве́рных утвержде́ние, кре́ст — а́нгелов сла́ва и де́монов я́зва.

Сла́ва Отцу́, и Сы́ну, и Свято́му Ду́ху.

сщмч. Анфи́ма, епископа Никомидийскаго, и с ним мчч. Фео́фила, диакона, Дорофе́я, Мардо́ния, Мигдо́ния, диакона, Петра, Инди́са, Горго́ния, Зино́на, До́мны девы и Евфи́мия Лик приведи́ днесь ле́тный весь, Никомиди́йский, ра́дуяся, гра́де,/ добраго па́стыря твоего́, и взыгра́й, назира́теля име́яй, соблюда́юща тя,/ вре́да враг вы́шша.

И ны́не, и при́сно, и во ве́ки веко́в. Ами́нь.

КрестобогородиченПолный текст песнопения У креста́ предстоя́щи, Тя́ безсе́менно Ро́ждшая, и рыда́ющи вопия́ше: увы́ Сладча́йшее Ча́до, ка́ко заше́л еси́ от о́чию Мое́ю? ка́ко в ме́ртвых вмени́лся еси́?

Хвалитны

Псалом 148

Чтец: Хвали́те Го́спода с Небе́с. Тебе́ подоба́ет песнь Бо́гу. Хвали́те Го́спода с Небе́с, хвали́те Его́ в вы́шних. Тебе́ подоба́ет песнь Бо́гу. Хвали́те Его́, вси Ангели Его́, хвали́те Его́, вся Си́лы Его́. Тебе́ подоба́ет песнь Бо́гу.

Чтец: Хвали́те Его́, со́лнце и луна́, хвали́те Его́, вся зве́зды и свет. Хвали́те Его́, небеса́ небе́с, и во́да, я́же превы́ше небе́с, да восхва́лят и́мя Госпо́дне. Яко Той рече́, и бы́ша, Той повеле́, и созда́шася. Поста́ви я в век и в век ве́ка, повеле́ние положи́, и не ми́мо и́дет. Хвали́те Го́спода, от земли́ зми́еве и вся бе́здны, огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты, ца́рие зе́мстии и вси лю́дие, кня́зи и вси судии́ зе́мстии, юноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго. Испове́дание Его́ на земли́ и на Небеси́, и вознесе́т рог люде́й Свои́х. Песнь всем преподо́бным Его́, сыново́м Изра́илевым, лю́дем, приближа́ющимся Ему́.

Псалом 149

Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о сотво́ршем его́, и сы́нове Сио́ни возра́дуются о Царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Яко благоволи́т Госпо́дь в лю́дех Свои́х и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их: сотвори́ти отмще́ние во язы́цех, обличе́ния в лю́дех, связа́ти цари́ их пу́ты, и сла́вныя их ручны́ми око́вы желе́зными.

На 6: Сотвори́ти в них суд напи́сан, / сла́ва сия́ бу́дет всем преподо́бным Его.

Псалом 150

Хвали́те Бо́га во святы́х Его́, / хвали́те Его́ во утверже́нии си́лы Его́.

На 4: Хвали́те Его́ на силах Его, / хвали́те Его́ по мно́жеству вели́чествия Его́.

Хвали́те Его́ во гла́се тру́бнем, / хвали́те Его́ во псалти́ри и гу́слех.

Хвали́те Его́ в тимпа́не и ли́це, / хвали́те Его́ во стру́нах и орга́не.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Тебе́ сла́ва подоба́ет, Го́споди Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.

Стихиры на стиховне

Октоих, глас 6, среда на 3 Канонарх: Глас шесты́й. О Кресте́ упова́ние име́ю, Христе́.

Лик (хор): Глас 6: О Кресте́ упова́ние име́ю, Христе́, / и о не́м хваля́ся вопию́: Человеколю́бче Го́споди, горды́ню низложи́, не испове́дающих Тебе́ Бо́га и Челове́ка.

Канонарх: Стих: Испо́лнихомся зау́тра ми́лости Твоея́ Го́споди, и возра́довахомся, и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́.

Лик (хор): и наста́ви сы́ны и́х.

Глас 6: И́же Кресто́м огражда́еми, врагу́ противля́емся, не боя́щеся ко́зней его́ и ла́яния: я́ко бо го́рдый упраздни́ся, и попра́н бы́сть си́лою на дре́ве Пригвожде́ннаго Христа́.

Канонарх: Стих: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с.

Лик (хор): и де́ло ру́к на́ших испра́ви.

Глас 6: Па́мять му́ченик, ра́дость боя́щымся Го́спода: пострада́вше бо Христа́ ра́ди венцы́ от него́ прия́ша: и ны́не со дерзнове́нием мо́лятся о душа́х на́ших.

Канонарх: Слава, глас четве́ртый.

Лик (хор): Сла́ва Отцу́, и Сы́ну, и Свято́му Ду́ху.

Глас 4: Никомиди́йскому великогра́ду/ всяк град и страна́ спра́зднует днесь/ в па́мять честна́го его́ граждани́на,/ и́бо концы́ земни́и пле́щут,/ веселя́щеся ны́нешним торжество́м священному́ченика./ Сему́ и мы, пе́сньми, я́ко цве́ты, венцы́ спле́тше, возопии́м:/ ра́дуйся, па́стырю до́брый, я́же ду́шу положи́вый за о́вцы,/ же́ртва и жрец, иере́й и овча́./ Тебе́ мо́лимся:/ с пострада́вшими с тобо́ю Христа́, Анфи́ме, моли́/ ста́до твое́ сие́ от иноплеме́нных волко́в изба́вити// и Небе́сныя огра́ды с тобо́ю сподо́битися.

Канонарх: И ныне, глас то́йже.

Лик (хор): И ны́не, и при́сно, и во ве́ки веко́в. Ами́нь.

Крестобогородичен, глас 4: Распина́ема Христа́ Человеколю́бца/ ви́дящи Пречи́стая/ и ре́бра ископава́ема копие́м,/ пла́чущи, вопия́ше: что сие́, Сы́не Мой?/ Что Тебе́ неблагода́рнии лю́дие возда́ша/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,// Твоему́ во́льному распя́тию.

Тропа́рь священному́ченика Анфи́маГлас 4: И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д:/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Анфи́ме,/ моли́ Христа́ Бо́га// спасти́ся душа́м на́шим.

Сла́ва Отцу́, и Сы́ну, и Свято́му Ду́ху.

Тропарь прп. Феокти́ста Палестинскаго, спостника Евфимия Великаго, игуменаГлас 8: Слез твои́х тече́ньми пусты́ни безпло́дное возде́лал еси́/ и и́же из глубины́ воздыха́ньми во сто трудо́в уплодоноси́л еси́/ и был еси́ свети́льник вселе́нней,/ сия́я чудесы́, Феокти́сте, о́тче наш,// моли́ Христа́ Бо́га спасти́ся душа́м на́шим.

И ны́не, и при́сно, и во ве́ки веко́в. Ами́нь.

Крестобогородичен, глас 8: Плод чре́ва Твоего́, Богоневе́сто, / челове́ком показа́ся спасе́ния хода́тайственный. / Тем Тя, Богоро́дицу, / ра́зумом и язы́ком сла́вяще, / ве́рнии, велича́ем.